DAVAO CITY – Gipasalig sa Davao City Police Office (DCPO) nga himuon lamang nila nga simple ang ilang ipahigayon nga Christmas party.
Hinuon gibutyag ni Pol. Col Kirby Kraft, Director sa DCPO, nga magdepende lamang gihapon sa mga station commanders kung magpahigayon sila og Christmas party sa ilang mga estasyon.
Sa higayon nga makadesisyon ang mga police station nga dili magpahigayon og Christmas party, mamahimong mohatag na lamang ang mga nahisgutan og hinabang ngadto nabiktima sa linog.
Samtang gibutyag sab ni Pol. Brig. Filmore Escobal, regional director sa Police Regional Office (PRO) 11 nga ang pagsaulog sa kapaskohan o adlaw nga natawhan ni Hesukristo, magsilbi sumala pa nga basehan sa kapulisan sa mga sakripisyo sa labaw’ng makagagahom alang sa katawhan.
Gipahimangnoan sab niini ang mga kapulisan nga kinahanglan dili garbuso ang pagsaulog sa party sanglit adunay mga tawo sab karon ang mas nanginahanglan sama na lamang sa mga nabiktima sa kalamidad.
