DAVAO CITY – Nagpakita og suporta si City Transport and Traffic Management Office (CTTMO) head Dionesio Abude sa sugyot sa konseho ning siyudad sa Dabaw nga patas-an ang multa ug penalty sa mga motorista nga nagmaneho nga walay gihuptan nga Driver’s license.
Nasayran nga sukad Setyembre 2017 hangtud Hulyo 2019, usa sa pinakadaghan og nangadakpan mao ang pagmaneho nga walay igong lisensiya nga anaa sa 9,042.
Sa higayon nga maamyendahan ang traffic code dinhi sa dakbayan, makamulta og P1,000 ug 10 ka adlaw nga pagkabilanggo sa 1st offense; P3,000 ug 15 ka adlaw nga pagkabilanggo sa second offense ug P5,000 ug usa ka bulan nga pagkabilanggo sa 3rd offense.
Samtang gibutyag sab ni Konsehal Conde Baluran nga sobra lang kalu-ag ang gipahamtang nga multa alang sa mga motorista nga nakalapas sa traffic code sa siyudad hinungdan nga angayan lamang nga amyendahan na ang maong balaudnon.
Gani pipila sumala pa sa mga motorista ang nawad-an na sab og respeto ngadto sa mga traffic enforcers.
