DAVAO CITY – Pag-ubos sa crime rate sa rehiyon ingon man pagtahan sa daghanang ihap sa mga rebelde ang usa sumala pa sa mga rason nga kinahanglan na nga bakwion ang pagpatuman sa Martial law dinhi sa Davao region.
Sumala pa kang Police Brig. Gen. Filmore Escobal, regional director sa PRO-11, nakab-ot na karon sa rehiyon ang mga gikinahanglan nga mga rekisitos aron nga hingpit ng tapuson ang pagpatuman sa balaod militar.
Gitataw sab ni Escobal nga sa kasamtangan, ila ng gisumite sa Camp Crame ang ilang assessment sa sitwasyon sa Davao region ug ila na lamang nga gihulat ang mamahimong desisyon niini.
Hinuon gipasalig sa PRO-11 nga kung dili na ilakip ang rehiyon ilabi na ang dakbayan sa Davao sa Martial law, ila pa gihapon nga ipatuman ang hugtanon nga seguridad aron masiguro ang kaluwasan sa publiko.
Padayon sab sumala pa nila nga imonitor kadtong mga grupo nga adunay mga dautan nga plano ug sagad malambigit sa pagmugna ug kagubot.
