DAVAO CITY – Tungod sa epekto sa makadaut nga Fusarium wilt o Panama disease sa mga banana industry sa Davao del Norte, gipaila-ila na sa Mindanao Development Authority (MinDA) ang sorghum farming.
Sumala pa kang Secretary Emmanuel Piñol napili nila ang Davao del Norte isip pilot area sa sorghum program diin tumong niini nga makamugna og feed grains alang sa poultry , hogs ug daghanan pa.
Gipasalig sumala pa ni Gov. Edwin Jubahib nga ang pipila ka areas sa lungsod sa Talaingod ang makapahimulos sa sorghum farming ingon man ang mga indigenous people’s (IP) community nga adunay halapad nga luna apan wala nila nagamit.
Nasayran nga ang Texas-based sorghum seeds company nga Scott Seeds ang midonar og 25-tons sa hybrid seeds ngadto sa MinDA.
Ang nahisgutan nga mga liso ang laoman nga moabot sa Mindanao sa unang quarter sa 2020 ug sugdan kini sa pagtanom sa bulan sa Pebrero.
Gitataw sab ni Piñol nga laing Texas sorghum seeds company nga Warner Seeds ang nagpadayag sab og interes sa paghatag og suporta sa sorghum development program sa Mindanao.
Nasayran nga ang Sorghum usa ka drought-tolerant grass o adunay katakos nga mabuhi luyo sa kainit sa panahon ug makamugna og grains nga sama kadako sa mongo beans nga ha-um sa pagkaon og feed grains.
