DAVAO CITY – Padayon pa karon nga giimbestigahan sa kapulisan sa Tagum ang insidente kalabot sa pagpusil sa usa ka pulis kinsa stable na ang kahimtang.
Una ng nahitabo ang insidente sa Purok Popular, Barangay Magugpo East, Tagum City sa milabay nga adlaw diin naghatud lamang sa iyang higala ang biktima nga si Police Corporal June Bataanon, 29-anyos kinsa naka destino sa San Isidro Municipal Police Station.
Kahinumduman nga samtang anaa sa nahisgutan nga dapit ang biktima, kalit na lamang nga miduol kaniya ang wala mailhing suspetsado ug kalit kini nga gipusil.
Dali nga gidala sa balay tambalanan ang biktima apan hangtud karon padayon pang gi-obserbahan ang kahimtang niini.
Una ng narekober sa crime scene ang upat ka basiyo sa mga bala.
Gipalawman pa karon sa otoridad ang imbestigasyon aron nga masayran kung si kinsa ang mipaluyo sa krimen ingon man ang motibo sa pagpusil sa biktima.
Una na sab nga gibutyag ni Pol Capt. Marvin Estaciones, commander sa San Isidro PNP nga subay sa ilang pagkaila sa biktima, usa kini ka maayong tawo ug wala siyay namonitor nga nalambigit kini sa dautan nga binuhatan.
