DAVAO CITY – Nagpadayon ang gipahigayon karon nga Oplan Tabang sa lokal nga panggamhanan alang sa mga nabiktima sa linog sa pipila ka lugar sa Mindanao.
Nasayran sa Task Force Davao (TFD) nga mikabat na sa 13,427 ka mga relief goods ang ilang nahatud sa mga lugar nga apektado sa pagtay-og.
Gani karong adlawa, laing hinabang na sab ang ilang ihatud sa mga residente sa Hagonoy Davao del Sur diin anaa sa 3,465 ka mga pamilya ang apektado.
Sumala pa kang Col. Consolito Yecla, commander sa Task Force Davao (TFD), nga anaa na sa 299 ka mga donors ang ilang samtang 6,230 ang nag-volunteer aron nga motabang sa pag-repack.
Hinuon padayon pa gihapon nga nanawagan si Col. Yecla sa mga buot motabang nga moadto lamang sa ilang headquarter sa Sta. Ana wharf ning siyudad.
Gani plano sab sumala pa karon sa TFD nga motukod ug make shift classroom sa mga biktima sa linog ilabi na nga daghanang mga estudyante ang wala nakapadayon karon sa ilang pag-eskwela.
