DAVAO CITY – Gikanayon sa Department of Health (DOH) Davao nga respiratory infection ang nag-una nga concern sa mga biktima sa linog sa nagkadaiyang evacuation sites sa rehiyon.
Subay sa report kalabot sa magnitude 6.6 nga linog nga miigo sa Tulunan, North Cotabato, nakatala sumala pa ang DOH ug kinatibuk-ang 52,728 ka mga pamilya o 257,053 ka mga indibidwal nga apektado sa linog sa 317 ka mga barangay sa Davao Region ug Soccsksargen.
Sa mga apektado nga mga pamilya, 11,830 o 56,646 ka mga indibidwal ang anaa sa temporary shelter sa 78 evacuation centers.
Samtang ang 9,110 ka mga pamilya ang nagpabilin sa ilang mga paryente o higala. Samtang gikanayon sab ni DOH Assistant Secretary Abdullah Dumama Jr., nga aduna silay pipila ka mga teams nga nagpahigayon ug health consultations sa 8,102 evacuees aron masubay ang health status sa mga nahisgutan.
Nagpahigayon sab ang ahensiya ug health education kalabot sa water sanitation ug hygiene sa mga bakwit gawas sa pa sa paghatag ug potable water, water containers, pagpahigayon ug water treatment ug daghanan pa.
