DAVAO CITY – Gikanayon ni Department of Education (DepEd) 11 spokesperson Jenelito Dodong Atillo nga kinahanglan ibalik gilayon ang klase sa labing madaling panahon ug dili kini mamahimong sa Enero 2020 ipadayon.
Gitumbok sa opisyal ang mga lalawigan nga grabeng naapektohan sa kusog nga pagtay-og.
Kahinumduman nga kini ang naunang hangyo sa mga ginikanan sa Davao del Sur gumikan kay nahadlok sila sanglit pipila sa mga tulonghaan sa nahisgutan nga lalawigan ang nakaangkon ug grabe nga kadaut atol sa pag-igo sa linog.
Sumala pa kang Atillo nga mamahimong ipadayon ang klase sa mga bata apan hinay-hinayon kini nga himuon hangtud nga mabalik sa normal ang sitwasyon sa mga kabataan ilabi na nga kadaghanan sa mga nahisgutan ang nakasinate pa gihapon ug trauma human ang kalamidad.
Samtang gitino sab ni Atillo nga ang ipahigayon nga make up classes sa mga apektadong estudyante wala sab nagpasabot nga kinahanglan moadto ang mga nahisgutan sa tulonghaan inay himuon sumala pa kini pinaagi sa paghatag ug assignment o aktibidad basta kay mapadayon lamang nila ang ilang pagtuon samtang anaa sila sa ilang panimalay o mga tent.
