DAVAO CITY – Mihatud sumala pa ug kalibog ang nahimong kamandoan ni Defense Sec. Delfin Lorenzana nga magpatuman ug checkpoints sa quake-affected areas sa Mindanao.
Kahinumduman nga una ng gibutyag ni Lorenzana nga kinahanglan adunay tukma nga pag-record sa mga maabot nga relief goods ug workers.
Gimando ni Lorenzana, Martial Law administrator in Mindanao, ngadto sa tanan nga mga head sa kagamhanan ang maong lakang dungan sa relief operations sa Davao del Sur ug North Cotabato.
Gikanayong pinaagi sa nahisgutan nga checkpoints, masiguro nga ang mga lihitimo ug otorisado lamang nga mga relief workers ang hatagan ug access sa mga evacuation centers ug maoy modawat sa relief goods ug supplies nga ihatag sa mga evacuees.
Himuon sumala pa ang maong lakang gumikan kay adunay migula nga report nga adunay pipila sa mga apektado sa linog ang moderitso sa mga sakyanan nga adunay karga nga relief goods ug kalit na lamang mga mokuha.
Apan ang nahisgutan nga sugyot ni Lorenzana ang gikuwestiyon sa pipila ka mga indibidwal ug naglaom nga gihimo ang maong lakang aron nga mamentina ang kahusay sa evacuation centers ug dili kay lisud-lisuron na hinuon ang pagsulod sa mga donasyon o hinabang nga ihatag sa mga nanginahanglan.
Sa bahin usab ni Atty. Caesar Europa, maayo ang lakang sa kasundalohan nga ipatuman ang seguridad sa evacuation centers apan kinahanglan nga dili mosangpot sap unto nga babagan ang mga hinabang gikan sa mga private citizens.
Una na sab nga gibutyag ni Capt. Jerry Lamosao, tigpamaba sa 10th Infantry Division (ID) Philippine Army nga alang lamang sa kaayohan sa mga residente ang ipahigayon ang checkpoint sa mga buot mosulod sa mga apektadong lugar aron nga mohatud ug hinabang.
