DAVAO CITY – Gibutyag sa Davao City Overland Transport Terminal (DCOTT) nga mag-deploy sila ug kapin 900 bus trips sugod sa Oktubre 31 hangtud Nobyembre 2, isip kabahin sa paghinumdom sa All Saints’ Day ug All Souls’ Day.
Sumala pa kang DCOTT head Aisa Usop nga ang nihap sa mga bus trips ang misaka gikan sa 650 ngadto na 700 buses matag adlaw ug gilaoman nila ang pagdagsa sa mga pasahero nga gikan sa gawas sa dakbayan aron lamang bisitahin ang lubnganan sa ilang mga minahal sa kinabuhi nga mitalima na sa laing kalibutan.
Gitataw sab ni Usop nga ang terminal mamahimo maka-cater ug gibana-banaang 30,000 ngadto na 35,000 ka mga pasahero sa normal lamang nga adlaw.
Apan tungod kay holiday sa nahisgutan nga mga adlaw, laoman nga mosaka kini ngadto sa 120,000.
Kaniadtong 2018, nakatala sumala pa ang DCOTT ug kapin 1,500 bus trips o anaa sa 70,000 ka mga pasahero ang midagsa sa terminal.
Posibleng modoble matud pa kini ilabi na nga natunong ug weekend ang pag-obserba sa kalag-kalag.
