DAVAO CITY – Mapasalamaton si Outgoing Davao City Police Office director, Col. Alexander Tagum sa lokal nga panggamhanan ilabi na kang Davao City Mayor Inday Sara Duterte-Carpio gumikan kay nahatagan siya ug kahigayonan nga mangatungdanan sa siyudad sulod sa kapin duruha ka tuig.
Kahinumduman nga hulipan na si Tagum ni Col. Kirby Kraft sa Police Regional Office 3 Highway Patrol Group isip bag-ong DCPO-Director.
Nasayran nga si Kraft usa ka miyembro sa Philippine National Police Academy class 1994 ug ulahi kini nga nadestino isip regional chief sa Highway Patrol Group 3.
Samtang naglaom si Tagum nga malabwan pa sa bag-ong liderato ilalom ni Kraft ang iyang mga nahimo aron nga mapalig-on pa ang han-ay sa kapulisan dinhi sa siyudad.
Kahinumduman nga daghanan ug accomplishment ang dakbayan atol sa pagpangatungdanan ni Tagum ilabi na ang pagdawat ug mga bag-ong sakyanan ingon man ekipo sa kapulisan nga dakong tabang sa ilang mga operasyon.
