DAVAO CITY – Gumikan sa nahimong epekto sa milabay nga kusog nga linog sa pipila ka bahin sa Mindanao, nanawagan ang ahensiya sa Public Safety and Security Command Center (PSSCC) ngadto sa mga nanag-iya ug gambalay sa siyudad nga subayon kung adunay mamatikdan nga liki sa mga semento ilabi na nga anaa sa intensity 5 ang Davao dihang nasinatian ang magnitude 6.3 nga linog.
Sumala pa kang Angel Sumagaysay, head sa PSSCC, angayan nga masayran kung adunay damyos aron nga dali kini nga masubay sa City Engineer’s Office ug mahimoan ug hinanali nga aksiyon.
Gitataw sab ni Sumagaysay nga dili gilayon madetermina ang mga liki kung dili kini personal nga subayon sa mga engineer o kadtong adunay igong kaalam kung kinahanglan ba nga ipailalom sa rehabilitasyon ang usa ka gambalay.
