DAVAO CITY – Nagpadayag og kabalaka ang Pilipino Banana Growers and Exporters Association (PBGEA) sa planong pagtangtang sa biosecurity installations sa farm roads sa banana plantations nga gi-operate sa Floirendo-owned Tagum Agricultural Development Co. (TADECO) gumikan kay mamahimo kining dakong bahad sa fusarium wilt infestation sa probinsiya.
Sumala pa kang PBGEA executive director Stephen Antig nga wala siya’y kasayuran kung nagpatuman na ang provincial government sa Davao del Norte sa pagtangtang sa biosecurity installations.
Kahinumduman nga laraw sa provincial government nga temporaryong tangtangon ang biosecurity features sama sa entry barriers nga mogiya sa publiko nga mo-agi sa “tire dips” ug insecticide sprays sa mga sakyanan ingon man “footbaths” sa mga tawo nga mosulod sa planta lakip na sa gates sa planta nga gidumala sa TADECO sa Barangay Tanglaw sa municipality sa Dujali; El Canto Road sa Barangay Balagunan sa Sto. Tomas; ug Bugtong Lubi Road sa Barangay Bobongon ingon man sa Sto. Tomas sa Davao del Norte. Una ng gibutyag sa PBGEA nga nakaapekto karon ang fusarium wilt o panama disease sa 2,402 ka ektarya sa banana plantations sa Barangays Kimamon, La Libertad, Salvacion, Talomo, Lungaog, Casig-ang, Balagunan, Tibal-og, ug Kinamayan sa Sto. Tomas, Davao del Norte diin walay gipahimutang nga biosecurity measures sa lugar.
