DAVAO CITY – Nagpadayon karon ang gihimong mga lakang sa lungsod sa Magsaysay Davao del Sur aron nga dali sila nga makabangon human ang dakong kadaut nga gihatud sa pag-igo sa Magnitude 6.3 nga linog sa milabay nga semana.
Kahinumduman nga hangtud karong panahona, nagpabilin pa gihapon sa mga gitukod nga tent ang pipila ka mga residente sa lugar human nga mahadlok na nga mobalik sa ilang panimalay ang mga nahisgutan ilabi na nga aduna pa gihapoy nasinatian nga mga afterschocks sa lugar.
Una ng gibutyag ni Magsasay Mayor Arthur Davin Sr., nga gamiton nila ang ilang calamity fund aron nga tabangan ang mga apektadong residente gawas pa sa daghanang hinabang nga ilang nadawat.
Una niini, nanawagan si Mayor Davin ngadto sa mga hingtungdan nga ahensiya sa kagamhanan sa Department of Social Welfare and Development Office (DSWD) ug Department of Health (DOH) nga mopahigayon ug stress debriefing sa mga residente nga apektado sa kalamidad sanglit pipila niini ang aduna pa gihapoy trauma.
