DAVAO CITY – Pasakahan na ug kasong kalapasan sa Republic Act 9165 kun Comprehensive Dangerous Drugs Act of 2002 ang usa ka giilang high value target nga nasikop atol sa gipahigayon nga check point sa kapulisan sa Toril ug mga sakop sa Task Force Davao (TFD).
Una ng gibutyag ni Col. Consolito Yecla, commander sa Task Force Davao (TFD) nga dihang mo-agi na unta sa checkpoint sakay sa iyang motorisklo ang suspek nga nailang si Aiveen Rey Lupo Alimpoos, hamtong ang pangidaron ug residente sa Sasa ning siyudad, aduna sumala pa kini gilabay nga papel ug dihang gisuta kini sa kapulisan ug task force davao nasayran nga 17 ka pakete kini sa ginadili nga droga nga moabot ngadto sa 69.79 grams o mokantidad ug halos P1.2 milyones ka pesos.
Gikanayong atol sa inspeksiyon aduna pay nahitabo nga komosyon tali sa suspek ug otoridad human nga dili buot ni Alimpoos nga mopailalom sa inspeksiyon.
Samtang sa bahin ni P/Lt. Col Jed Clamor, hepe sa Toril PNP, makonsidera nga high value target ang suspek gumikan sa dinagko na nga kantidad sa illegal nga droga ang iyang dala.
Buot sab nila nga masayran kung asa gikan ang iyang source ingon man asa ang iyang bagsakanan niini.
Una ng nasayran nga plano sumala pa nga dad-on sa dinakpan ang illegal nga droga sa Ecoland ning siyudad.
