DAVAO CITY – Muabot sa 252 ka mga tawo ang nadakpan sulod sa 10 ka adlaw nga operasyon batok sa nagkadaiyang matang sa krimen ning dakbayan sa Dabaw.
Gikanayon ni Major Jason Baria, tigpamaba sa Police Regional Office XI, ang nahisgutang kampanya ang gipangunahan ni Davao City Police Office (DCPO) director Police Col. Alexander Tagum gikan Oktubre 20 hangtud 30.
Samtang gikanayon usab ni Brig. Gen. Marcelo Morales, regional director sa PRO XI nga sa nahisgutang ihap, 36 niini ang mga suspected drug pushers nga nasikop sa gilusad nga 31 ka mga buy-bust operations.
Nag-una sa listahan sa accomplishment sa illegal drugs ang pagkasikop kang Jaymark Navarro, 27 anyos, taga Barangay Kapitan Tomas Monteverde, Agdao District, diin nakuha gikan kaniya ang halos P500,000 nga kantidad sa shabu.
Samtang 64 ka mga tawo sab ang nasikop gikan sa 56 ka mga operasyon batok most wanted persons subay sa simultaneous Oplan Dabaw Kalinaw sa 12 ka mga police stations sa syudad.
