DAVAO CITY – Gikatakda sumala pa nga ibalhin sa probinsiya sa Davao Oriental ang unom ka mga kanhi miyembro sa New People’s Army (NPA) ingon man mga sakop sa Milisya ng Bayan sa usa ka halfway house human nga mitahan sa gobyerno sa milabay nga semana.
Sumala pa kang Karen Lou Deloso, provincial information officer, nga ang mga mitahan naghulat na lamang ug tukma nga dokumentasyon aron nga i-turn over sila sa 701st Brigade Ugnayan Center, diin ipailalom sila sa napulo ka adlaw nga deradicalization course isip preperasyon sa ilang enrolment sa Enhanced Comprehensive Local Integration Program (E-CLIP).
Gitataw sab ni Deloso nga ang balhinan sa mga kanhi rebelde mao ang gitawag nga Happy Home usa ka pasilidad nga gigahin alang sa mga nahisgutan.
Una ng gibutyag sa usa sa mga mitahan nga NPA team leader nga si alyas Jan-jan nga nakadesisyon sila nga motahan sa mga rebelde gumikan kay nalisdan na sila sa ilang sitwasyon sa bukid.
