DAVAO CITY – Nakatala ang Department of Health ug 44 ka mga gikatahapan nga kaso sa Leptospirosis sa Davao Region sukad Enero ning kasamtangan nga tuig.
Kahinumduman nga upat na ka mga pasyente ang nakaangkon sa nahisgutan nga balatian ang namatay.
Sumala pa kang Health Regional Director Dr. Anabelle Yumang nga sa 12 ka kaso sa leptospirosis sa Compostela Valley, 1 niini ang namatay; Davao City nga adunay 17 ka kaso diin 3 ang namatay; Davao del Norte adunay 13 ka kaso, Davao del Sur ug Davao Oriental adunay tig-usa.
Samtang walay natalang kaso sa Davao Occidental.
Kahinumduman nga matag ting-ulan sagad maangkon ang Leptospirosis nga usa ka bacteria sa genus Leptospira ilabi na sa mga lugar nga apektado sa pagbaha.
Sa higayon nga dili matambalan, mamahimong makadaut kini sa kidney, makaangkon ug meningitis (inflammation sa membrane palibot sa utok ug spinal cord), liver failure, respiratory distress, ug kamatayon.
Gitino sab ni Yumang nga igo ang supply sa prophylaxis ngadto sa mga pasyente diin usa ka dosage lamang ang imnon aron nga protektahan kadtong delikado nga makaangkon sa nahisgutan nga balatian.
