DAVAO CITY – Bisan nga kalakip ang ilang pinuy-anan sa mga naapektohan sa kusog nga pagbaha kagabii, personal pa gihapon nga gisubay ni Vice Mayor Baste Duterte ang sitwasyon sa mga naapektohan nga mga residente partikular na sa bangkal ning dakbayan sa Davao.
Kahinumduman nga duol lamang sa sapa ang dugay na nga pinuy-anan sa iyang amahan nga si Pangulong Rodrigo Duterte nga sagad sab nga maapektohan sa mga pagbaha sa milabay nga mga katuigan.
Gawas sa mga opisyal sa kapulisan, rescue group ug mga nagkadaiyang hingtungdan nga ahensiya sa kagamhanan, gisubay gilayon sa Bise Mayor ang lugar nga temporaryong gisulongan sa mga residente.
Samtang una ng gibutyag ni Rodrigo Bustillo, head sa City Disaster Risk Reduction and Management Office (CDRRMO), nga bisan dili pa nila mahatag ang ensakto nga ihap sa mga apektadong residente, apan usa sumala pa kini sa pinakadakong pagbaha nga nasinatian sa dakbayan partikular na sa Talomo river.
Samtang una na sab nga nagpahimangno si Public Safety and Security Command Center (PSSCC) head Benito de Leon sa mga residente nga kung masinatian ang kalit nga pagbaha, mas maayong dili na maghulat ug pahimangno ug diretso na lamang nga mobakwit aron nga dili mabutang sa risgo ang kinabuhi.
