DAVAO CITY – Gikalot sa mga otoridad ang bukog sa tulo ka mga missing persons lakip na ang usa ka sundalo ug usaka retired police officer sa duha ka mabaw lamang nga lubnganan sa Kitaotao, Bukidnon kagahapong adlawa – insaktong duha ka tuig human nga sila gika-report nga gidagit sa mga rebelde.
Gipang-ila ni Lt. Col. Silas Trasmontero, commander sa 89th Infantry Battalion sa Philippine Army ang mga biktima nga sila Sgt. Reynante Havana Espana, 42, taga San Francisco, Agusan del Sur ug na-assign sa Surigao del Sur; Joel Rey Galendez, 43, usaka retired police officer sa Bunawan Agusan del Sur; ug Dionisio Camarillo Havana alias Dondon, 37, taga Sto. Nino, Carmen, Davao del Norte ug tribal datu sa Agusan del Sur.
Ang tulo na-missing sukad niadtong August 22, 2017 human sila gika-report nga gipangdagit sa mga sakop sa New People’s Army (NPA) samtang mi-agi sa usaka road blockade sa Sitio Nabunturan, Barangay Digonga, Kitaotao, Bukidnon.
Gipahigayon ang pagkobkob human mihatag ug tip ang usaka rebelde nga bag-ohay lamang misurrender.
