DAVAO CITY – Gi-andam na sa lokal nga panggamhanan ang ihatag nga hinabang alang sa mga nabiktima sa nahitabong sunog sa Purok 2, Punta Dumalag, Barangay Matina Aplaya, ning dakbayan kagahapong nga milamoy sa 133 ka mga pinuy-anan.
Sumala pa kang Senior Fire Officer 2 Ramil Gillado, Investigation Section chief sa BFP-Davao, nga padayon karon ang gihimong pag-validate sa Davao City Social Services and Development Office sa mga nabiktima sa sunog aron nga mahatagan gilayon ang mga nahisgutan ug hinanali nga hinabang.
Kahinumduman nga nagsugod sumala pa ang sunog sa pinuy-anan sa usa ka Maricel Barcenas.
Sa 113 ka mga nasunog nga panimalay, 132 niini ang totally damage samtang anaa sa 159 ka mga pamilya ang displaced. Una ng nasayran sa BFP nga miabot ngadto sa ikatulong alarma ang sunog.
Hinuon walay natalang casualty gawas lamang sa naangol nga nailang si Junrey Lape, 30 anyos nga nasamad ang wala nga paa.
Mukabat usab sa P1.3 million ang natalang damyos sa maong insidente.
Padayon sab ang panawagan si Gillado ngadto sa publiko nga bantayan kanunay ang mga linya sa kuryente ug likayan ug paggamit ug mga substandard nga mga butang nga maoy sagad hinungdan sa sunog.
