DAVAO CITY – Gibutyag sa Davao Region Police Office nga wala silay pabor-pabor sa pagpatuman sa ilang massive regular promotions program.
Gipasalig ni Brig. Gen. Marcelo C. Morales, regional police director, nga matag police officer adunay katakos nga ma-promote bisan nga kaila o dili nila kini kaila apan maayo ang gipakita nga performance.
Gani nagmugna na matud pa sila ug oversight committee, nga gilangkuban sa mga miyembro sa promotional board sa commissioned officers ug non-commissioned officers nga maoy mo-review sa aplikasyon.
Gawas sa maayo nga credentials, kinahanglan sab nga adunay good moral character ang usa ka police officer.
Sa kasamtangan, wala pa gipagula sa Directorate for Personnel and Records Management ( DPRM) ang gi-aprubahan nga quotas sa matag rehiyon aron nga mapun-an ang bakante sa matag ranggo gikan sa police commissioned officers ug non-commissioned officers.
