DAVAO CITY – Padayon ang pahimangno karon sa pamunoan sa Davao City Overland Transport Terminal (DCOTT) ngadto sa publiko nga likayan ang pagsakay sa mga kolorum nga mga sakyanan ilabi na kadtong gikan sa mga kasikbit nga lalawigan nga mobisita sa dakbayan aron makighiusa sa nagpadayon nga Kadayawan sa Davao.
Una ng gibutyag sa DCOTT nga delikado ang pagsakay sa mga kolorum nga mga sakyanan sanglit wala kini katakos nga mabayran ang ilang mga obligasyon sa higayon nga madisgrasya.
Hinuon gipasalig ni Aisa Yusoph, manager sa DCOTT, nga bastante ang mga bus units sa higayon nga modagsa ang mga bisita dinhi sa dakbayan.
Wala sab sumala pay angayan nga kabalak-an ang mga pasahero gumikan kay mas gipahugtan nila karon ang pagpatuman ug seguridad sulod sa terminal.
Subli sab kini nga nanawagan sa mga pasahero nga dili magdala ug mga mahait nga butang sa higayon nga mosulod sa DCOTT gumikan kay dili sila magpanuko nga kumpiskahon kini.
Samtang una na sab nga gitambag ni Atty. Armand Dioso, Regional Director sa Land Transportation Franchising Regulatory Board (LTFRB-11) nga mahinungdan nga tan-awon sa mga pasahero ang body markings sa pampasaherong sakyanan sama sa Van ug kung accredited kini sa Department of Tourism (DOT) o sa City Tourism Operations Office (CTOO).
