DAVAO CITY – Kinatibuk-ang 360 ka mga wanted personalities, 64 niini mga most wanted persons ug New People’s Army high-ranking official ang nasikop sa otoridad latas sa Davao region sulod lamang sa bulan sa Hulyo ning tuig kasamtangan.
Sumala pa kang Police Regional Office-Davao Director Marcelo Morales nga kini ang nahimong accomplishment sa kapulisan gumikan sa sunod-sunod nga mga operasyon sa tanan nga mga intelligence operatives ug warrant section personnel.
Nakasikop sab sumala pa ang Davao City Police Office ug 143 wanted individuals, samtang ang Davao del Norte Police Provincial Office nakasikop 57.
Ang Compostela Valley Police Provincial Office anaa sa 54 ang nasikop samtang ang Davao del Sur Police Provincial Office – 46, Davao Oriental police – 42, ug Davao Occidental police anaa sa 18.
Gi-awhag ni Morales ang tanan nga mga police commanders nga gukdon kadtong dugang nga mga wanted personalities isip kabahin sa ilang anti-criminality campaign.
Usa sa ilang pinakadako nga accomplishment mao ang pakasikop sa most wanted person nga si Ronnie Dumasig Campaner, 51, residente sa Purok Lauan, Barangay Poblacion, King-King Pantukan, Compostela Valley, giilang commanding officer sa Guerilla Front 2, Southern Mindanao Regional Command, ug gikonsiderang most wanted person sa Armed Forces of the Philippines.
Malampuson sab nila nga nadakpan si Richard Gulfan Orayan, 43 anyos, giilang most wanted person sa nasod nga nasikop sa Talaingod, Davao del Norte kinsa nalambisit kini sa kidnapping with ransom. Gipasalig sa kapulisan nga magpadayon ang ilang paggukod sa mga tawo nga pinangita sa otoridad.
