DAVAO CITY – Gipasalig sa Department of Education (DepED) 11 pinaagi sa ilang tigpamaba nga si Jenielito Dodong Atillo nga ilang imbestigahan ang gikanayong padayon nga operasyon sa usa ka tulonghaan sa Salugpongan luyo sa gipagula nga suspension order sa ahensiya batok niini.
Una ng gipasara ang Salugpongan gumikan kay kulang kini sa mga gikinahanglan nga mga reksitos ingon man reklamo nga gipadangat sa mga lumad nga nagtudlo kini ug dili maayo sa ilang mga kabatan-onan.
Una niini, nagtuo si Atillo nga tutor na lamang ang gihimo karon sa mga sakop sa salugpongan ngadto sa mga bata apan ila pa gihapon kini nga imbestigahan pinaagi sa ilang gimugna nga fact finding team ilabi na nga nagpabilin karon nga suspendido ang maong tulonghaan.
Gitataw sab ni Atillo nga posibleng gisaaran sab sa salugpongan ang mga bata nga i-promote kini sa mosunod nga grade level sa sunod tuig hinungdan nga nagpadayon kini sa ilang pagtudlo bisan nga walay tukma nga permit.
