DAVAO CITY – Gideklara karon ang San Pedro square isip maximum security zone.
Una ng miduso ang City Council ug resolusyon subay sa sugyot nga gisumite ni konsehal Maria Belen Acosta, chair of the committee on peace and public safety.
Gihimo ang nahisgutan nga lakang gumikan kay ang San Pedro Square ang nag-unang venue sa mga dagkong event ug aktibidad sa siyudad sama sa tinuig nga kasaulogan sa Kadayawan sa Davao, Araw ng Davao ug daghanan pa.
Kahinumduman nga sakop sa San Pedro square ang City Hall, Sangguniang Panlungsod, Davao City Police Office, San Pedro Cathedral ug daghanan pa. Laoman sab nga ang maong dapit maoy dagsaon sa bagang duot sa katawhan.
Dungan sa deklarasyon sa maximum security zone, ang access sa entry points ang kontrolado ug gilimitahan lamang sa otoridad hinungdan nga ipatuman nila ang hugtanon nga inspeksiyon sa mga bisita ingon man mag-monitor sulod sa 24 hours matag adlaw sulod sa pito ka adlaw ang peace-keeping forces.
Samtang gikanayon sab ni Task Force Davao commander Col. Consolito Yecla nga ang ilang hangyo sa City Council tipik lamang aron nga mapatuman sa otoridad ang mga polisiya ug epektibo nga matutokan ang seguridad sa katawhan.
