DAVAO CITY – Gikumpirma sa National Commission on Indigenous Peoples (NCIP) nga ang bag-ong napiling Indigenous Peoples Mandatory Representative (IPMR) nga si Datu Demetrio Bolo sa Bagobo Klata/Guiangan tribe gikatakda na nga manumpa sa bulan sa Agosto.
Sumala pa kang NCIP-Davao director Geroncio Aguio, gisapinal na nila karon ang mga dokumento sa paglingkod ni Bolo ingon man ang petsa sa ilang pagpanumpa isip IPMR sa 19th City Council.
Molingkod sumala pa kini sa katungdanan atol sa kadayawan sa dakbayan.
Kahinumduman nga nabakante ang maong posisyon human nga nag-isyu ang NCIP ug Certificate of Termination ngadto kang Bai Halila Sudagar sa milabay nga Hulyo nga nagpugong sa iyang status isip City Council IPMR.
Temporaryo nga milingkod si Sudagar sa IPMR position kaniadtong Agosto 2018 human nga na-diskwalipika si Cherry Ann Ortiz-Codilla gumikan sa kakulangon niini ug genealogy requirements.
