DAVAO CITY – Dili sumala pa i-undang sa Davao City Risk Reduction Management Council (CDRRMC) ang pagtukod sa P26-million evacuation center nga gitukod sa Barangay Los Amigos, Tugbok District ug nahimutang sa Lacson Fault segment sa Central Davao Fault System.
Sumala pa kang CDRRMC Training Director Lyndon Ancajas nga nagsugod na ang konstruksiyon ayha pa man nila nadawat ang impormasyon nga kabahin kini sa fault line.
Ang nahisgutan sumala pa nga evacuation center magsilbi nga temporaryong kasilungan sa mga tawo sa ikatulong distrito sa higayon nga adunay mahitabong kalamidad sama sa pagbaha ug sunog.
Gitataw ni Ancajas nga kinahanglan makompleto ang pagtukod sa maong evacuation ilabi na nga gigahinan na kini ug pundo gikan sa Commission on Audit (COA) uban ang nasabutan nga timeline ug aron nga dili kini makuwestiyon.
Nasayran nga 98% na sab kini nga nakompleto. Gitataw sab sa opisyal nga gawas sa pagtamud sa National Building Code sa Pilipinas, motamud sab sumala pa sila sa guidelines of Phivolcs sa pagtukod ug gambalay ilabi na kung duol kini sa fault lines aron nga mapangandaman ang linog.
