DAVAO CITY – Gipahimangnoan sa Regional Internal Affairs Service (RIAS) 11 ang mga sakop sa kapulisan nga likayan ug paghimo ug mga kalapasan ilabi na sa ilang kaugalingong pamilya.
Kini ang tambag sa ahensiya bisan nga wala pa silay natalang kaso sa economic abuse karong tuiga.
Sumala pa kang P/B Gen. Jose Carumba, Regional director sa RIAS 11 nga sa milabay nga 2018 mikabat sa 301 ka mga reklamo ang ilang nadawat human nga wala sumala pa gihatagan ug sustento ang mga asawa gikan sa ilang mga bana nga pulis.
Gitataw sab sa opisyal nga kung aduna man silay nadawat nga reklamo, ila gilayon kini nga sulbaron ayha pa man moduso ug kaso ang mga reklamante.
Sa milabay nga tuig, nakatala sab ang RIAS -11 ug unom ka kaso sa Violence against Women and their Children (VAWC) o pag-abandona sa ilang pamilya.
Gi-awhag na lamang ni Carumba nga kung adunay reklamo sa ilang bana o asawa nga pulis, mas maayong moadto gilayon sa ilang buhatan.
