DAVAO CITY – Nasuta sa mga sakop sa Marina ug Philippine Coast Guard (PCG) Davao nga naka-angkon ug daku nga buslot ang chartered boat nga naunlod niadtong Dominggo sa buntag samtang mogikan na unta alang sa island hopping sa Island Garden City of Samal.
Sumala pa kang Lt. Col. George Maganto, PCG Davao Commander nga nakamugna ug lungag sa ilalum sa chartered boat ang pagkasabod sa pisi sa propeller niini.
Gitataw sa Coast Guard nga aksidente ang nahitabo ug higpit nga regulasyon ang gipatuman nila sa mga motabok sa Island Garden City of Samal, particular ang pagbaton ug manifesto ug nakasul-ob ug life jacket ang mga pasahero.
Kahinumduman nga 45 ka mga pasahero ug upat ka mga tripulante ang nabutang sa katalagman dihang nasudlan ug tubig ug hinay-hinay nga naunlod ang chartered boat nga ilang gisakyan.
