DAVAO CITY – Gitataw sa Department of Education (Dep Ed) Eleven nga mahinongdanon gayud ang tubig alang sa mga atleta atol sa Palarong Pambansa nga dinhi ipahigayon sa dakbayan sa Davao.
Sumala pa kang Mr. Genelito ‘Dodong’ Atillo, tigpamaba sa Dep Ed Eleven nga sa pag-host sa Ilocos Sur sa Palarong Pambansa alas 11:00 pa lamang ang takna sa buntag hugtanon na nga i-dili ang pagsulod sa tubig sa venue sa dihang gipahigayon ang opening ceremony nga wala gayud kalikaye ug daghanan nga mga atleta ang nangakuyapan atol sa opening ceremony human makasenati ug naghinobra nga kainit sa panahon.
Gituohan nga makatabang sa mga atleta ang ipakatag nga drinking venue, labi na sa Davao City Sports Complex nga makaplagan sa UP Mintal, ning dakbayan aron nga dili ma-dehydrate ang mga kinse mil ka mga atleta nga modagsa sa dakbayan.
Sa tinguha nga dili nabulad sa naghinobra nga kainit sa adlaw ang Athletics dula-on lamang alas 6:00 sa buntag hangtud na sa alas 10:00 molungtad ang athletics.
Alas 10:00 sa buntag hangtud sa alas 3:00 sa hapon wala unang dula nga ipahigayon, labi na sa track and field gumikan sa naghinobra nga kainit sa panahon atol sa maong mga orasa.
Magpadayon ang mga dula alas 3:00 sa hapon hangtud na sa alas 7:00 sa gabii depende na sa mamahimong dagan sa mga dula.
