DAVAO CITY – Gihikay na ang kaso batok ngadto sa usa ka estudyante nga nadakpan human mamaligya ug illegal nga druga atol sa gilusad nga buy-bust operation sa kapolisan sa Talomo Police Station.
Gipangunahan ang nahisgutan nga anti-drug operation ni PCI Ronald Lao, diin nadakpan ang nahisgutan nga magtutungha nga usa ka John Cerilo Goc-ong Albiar, alyas John, 27 anyos, residente sa Emirald St., Ecoland, ning dakbayan sa Davao.
Napalitan sumala pa ang nahisgutan nga suspek ug usa ka rectangular nga pakete sa shabu, bugti sa usa ka libo ka pesos nga buy bust money.
Atol sa pagkadakop sa nahisgutan nga suspek, na-recover pa gikan sa iyang posisyon ang lain pa nga tulo ka mga pinataas nga sachet sa shabu, usa ka unit sa cellphone nga gituohan nga mao ang ginagamit niini sa transaksyon sa illegal nga druga, scratch paper, ug lakip na ang mga nagkada-iya nga salapi nga gihoptan niini ug ang iyang drivers license.
Nasayran nga nagkantidad ang nahisgutan nga illegal nga druga ug kapin kun kulang kwatro mil ka pesos.
Ang dinakpan kasamtangan karon nga anaa sa bilanggo-an sa Talomo Police Station.
Kasong paglapas sa Republic Act 9165 kon Comprehensive Dangerous Drugs Act of 2002 ang gihikay nga kaso batok ngadto sa dinakpan.
Ang mga nasakmit nga illegal nga druga gipadala na sa PDEA-11 alang sa dugang eksaminasyon.
