DAVAO CITY – Pabilin pa gihapon nga wala maila ug wala’y nakuha nga identification card gikan sa nakaplagan nga patay nga lawas sa usa ka lalaki nga biktima sa salvaging o summary execution nga nakaplagan alas 11:00 ang takna kagahapon sa buntag sa sapa nga bahin sa Balutakay, Hagonoy, Davao del Sur.
Usa sumala pa ka mangingisda nga naila nga usa ka Ronel dela Cruz, hamtong ang pangidaron, reesidente sa Balutakay, Hagonoy, Davao del Sur ang nakadiskobre sa patay nga lawas sa biktima nga naglutaw sa sapa nga bahin.
Dali sab dayon nga gipadangat sa mangingisda ang impormasyon labot sa nakaplagan nga patay ngadto sa mga Barangay official, hinongdan nga mi-responde ang kapolisan gikan sa Hagonoy Police Station ug sa gihimong imbestigasyon nasayran nga ang patay nga lawas sa usa ka lalaki, gibana-bana nga anaa sa pangidaron ug kapin baynte anyos.
Gibinaklid paggapus ang mga kamot ug tiil sa biktima.
Nakahi-agum kini ug samad dinunggaban ug pinosilan.
Natahap ang kapolisan nga gipatay kini sa laing lugar ug gilabay lamang sa nahisgutan nga dapit.
Padayon pa ang gihimo nga dugang imbestigasyon sa kapolisan sa Hagonoy, Davao del Sur.
\Gituohan nga gihulog ang biktima sa tulay nga bahin sa Barangay Balutakay ug naanod lamang paubos.
Gipahimutang na ang patay nga lawas sa biktima sa usa ka punerarya sa dakbayan sa Digos, Davao del Sur.
