DAVAO CITY – Malampuson nga nakatapos ang 84 ka mga dugang miyembro sa Cafgu Active Auxiliary II (CAA II) sa basic military training kagahapong adlawa sa headquarters sa Task Force Davao sa Sta. Ana Wharf ning siyudad.
Andam na matud pa ang mga nahisgutan nga ipakatag aron motabang sa pagpatuman ug hugtanon nga seguridad sa dakbayan.
Matud pa kang Lt. Col. Randolph Cabangbang, deputy commander sa Task Force Davao (TFD), ipakatag nila ang mga nahisgutan sa mga nagkadaiyang checkpoints sa Barangay Sirawan, Lacson, ug Lasang ning siyudad.
Natapos sa mga nahisgutan ang 45-day training nga nagsugod kaniadtong Mayo 3 ug gikatakda na nga i-dpeloy sa downtown areas aron modugang sa manpower requirements sa TF Davao isip mandato aron nga batukan ang terorismo ug mapabilin ang kalinaw sa dakbayan.
Mipailalom ang mga nahisgutan practical exercises ug mga action drills nga gilangkuban sa theories sa military professionalism ug daghanan pa.
Samtang gikanayon sab ni Col. Nolasco A. Mempin, commander sa TF Davao, nga kinahanglan mopailalom sab ang mga gi-recruit nga CAAs sa basic military training aron nga mapalambo pa ang iyang kaalam ug katakos sa ilang mamahimong katungdanan.
Himuon na matud pa karon sa Task Force Davao ang hugtanon nga training alang sa CAA II aron nga epektibong maprotektahan ang katawhan batok sa pagpanagtake sa mga terorista ingon man pabilin nga ma-protektahan ang seguridad sa katawhan sa dakbayan.
