DAVAO CITY – Mukabat sa 3,000 ka mga sako sa basura ang nahipos sa Bantay Dagat volunteers gikan sa 32 ka mga coastal areas sa dakbayan sulod lamang sa bulan sa Mayo 2018.
Matud pa kang Paul Bermejo, Officer-in-charge sa Ancillary Services Unit, sagad s amga basura nga nakolekta mao ang mga plastic bottles, wrappers, ligid, sako ug rubber slippers.
Subay sa data gikan sa ASU, sagad sa mga lugar nga adunay daghanang basura nga nakolekta mao ang Barangay 23-C.
Nasayran nga ang mga miyembro sa Bantay Dagat kanunay nga nagapahigayon ug clean up operations sa coastal communities dinhi sa dakbayan.
Gi-awhag sab ni Mayor Inday Sara Duterte ang komunidad nga mopartisipar sa gihimong pagpaningkamut aron lamang malimpiyohan ang palibot ug kinahanglan nga bahin-bahinon ang mga basura ug mosalmut sa clean up drives.
Hinuon gitino ni Bermejo nga ang mga basura nga nakolekta sa nahisgutan nga Barangay wala lamang naggikan sa maong dapit gumikan kay pipila niini ang gidala lamang sa kusog nga ulan.
Sa kasamtangan, aduna sumala pay 300 ka mga Bantay Dagat volunteers nga padayong nagpahigayon ug simultaneous clearing operations sa 32 coastal areas. Ginapahigayon ang clearing operations matag adlaw nga sabado.
Ang Bantay Dagat gilunsad ni Mayor Inday Sara Duterte sa milabay nga bulan sa Oktubre 2017 kini aron nga pabilin nga maprotektahan ang kadagatan ug coastal areas sa siyudad.
