Nagmapasalamaton ang katawhan sa dakbayan karon nga duna na’y baligya nga mas barato nga commercial rice sa merkado sa Agdao, ning dakbayan.
Nasayran nga ekslusibo ang baligya sa mga NFA outlet apan giklaro sa mga vendors nga dili kini NFA rice gumikan kay ang nahisgutan nga bugas naggikan sa mga traders sa nasod.
Mapalit sa kantidad nga P39 pesos ang matag kilo sa bugas apan kutob lamang sa tag duha ka kilo ang mapalit sa mga konsumante.
Ginganlan ug ‘Tulong sa Bayan’ isip tubag sa mga magpapatigayon ug bugas sa awhag ni Pangulong Rodrigo Duterte nga mosuporta sa kakulangon ug supply sa NFA rice.
Taliwala niini masaligon pa gihapon ang mga NFA retailers nga mo-abot sa katapusan karong bulana ang bag-o nga NFA rice gikan sa Vietnam ug Thailand.
Mokabat ngadto sa 150 mil ka metriko tonelada nga imported rice ang gipalit sa Pilipinas, pinaagi sa government to government contract, human nga nahurot ang supply sa NFA rice sa nakalabay nga bulan.
