DAVAO CITY – Usa ka semana ayha ang ipahigayon nga Barangay ug SK elections, nangandam na karon ang Daniel R. Aguinaldo National High School (DANHS) ilabi na nga sa ilang tulonghaan moboto si Pangulong Rodrigo Duterte.
Matud pa sa kadumalahan sa eskwelahan, ipagawas nila ang arm chair nga gigamit kaniadto sa Pangulo dihang miboto kini sa milabay nga Presidential Election sa tuig 2016.
Kahinumduman nga gikonsidera nila nga kabahin sa kasaysayan ang gigamit nga arm chair ni Pangulong Duterte hinungdan nga ila kining gisulod sa usa ka glass kalakip na ang gigamit nga ballpen nga gihigot sa arm chair.
Sukad nga gideklara nga midaug ang kanhi Mayor sa dakbayan, gilayon nila nga gibutang sa usa ka dakong glass ang nahisgutan nga arm chair aron nga pabilin kini ma-preserba gumikan kay usa sumala pa ka dakong dungog nga gikan sa dakbayan ang nahimong Pangulo ug labing una nga taga Mindanao nga nagdumala sa nasud.
