DAVAO CITY – Gipahugtan karon kapulisan ug kasundalohan ang ilang gipatuman nga security measures sa nagkadaiyang areas sa rehiyon isip kabahin sa ilang paghinumdom sa semana Santa.
Una ng gibutyag ni Chief Insp. Milgrace Driz, tigpamaba sa Police Regional Office (PRO) XI, nga tanana nga mga police stations ang naka-high alert ilabi na sa anibersaryo sa New People’s Army (NPA) karung adlawa.
Laoman sab sumala pa ang pagdagsa sa mga tawo karung adlaw sa mga simbahan, retreat houses, inland resorts ug beach resorts. Samtang i-assist sab sa mga personahe sa PRO XI ang mga motorista, commuters ug general public pinaagi sa mobile patrols ug random checkpoints sa mga simbahan, procession sites, airports, seaports, ug mga tourist destinations.
Gipasalig sab sa otoridad nga ilang bantayan ang mga residential areas aron nga dili makapahimulos ang mga kawatan nga sagad sulod ang mga panimalay nga walay mga tawo. Gitataw sab ni Sr. Insp. Maria Teresita Gaspan, tigpamaba sa Davao City Police Office (DCPO), nga nakiglambigit sila sa Task Force Davao, City Transport and Traffic Management Office (CTTMO) ug Public Safety and Security Command Center (PSSCC) ingon man uban pang operating units sa pagpatuman sa security plan.
Samtang gibutyag sab ni Aiza Yusop, general manager sa Davao City Overland Transport Terminal (DCOTT), nga laoman sumala pa karon ang kapin 1,000 ka mga biyahe matag adlaw apan mas doble sumala pa karong adlawa sanglit dyutay lamang nga mga unit sa bus ang mobiyahe ugmang adlawa, Biyernes Santo.
