DAVAO CITY – Unom ka lain pang mga barangay officials sa Region 11 ang padayong gipanid-an sa Philippine Drug Enforcement Agency (PDEA) gumikan sa kalambigitan sa illegal nga druga.
Apan nagdumili una ang PDEA sa pag-ila sa nahisgutang mga barangay officials aron dili mabalda ang ilang imbestigasyon.
Apan gikanayon sa maong ahensiya nga ang nahisgutang mga barangay officials na lamang ang nahabilin sa mga narco politicians sa rehiyon nga naa sa barangay level.
Kahinumduman nga katapusang nadakpan sa PDEA ang barangay kagawad sa Panabo city nga si John Terrel Nardo, 36 anyos, taga Purok Pomelo, Block 8, Quilsadio Subd. Brgy New Visayas Panabo City kinsa nakuhaan ug halos 10 ka gramo sa shabu nga gibana-banagng nagkantidad ug 120 mil ka pesos. Nasayran nga nangatungdanan isip barangay kagawad sa New Visayas si Nardo sukad niadtong 2008 ug sa kasamtangan nagsilbi usab kining chairman sa Barangay Peace and Order Council.
Sa pikas bahin, gikanayon ni Noli Demaandal, tigpamaba sa PDEA 11 nga gipasaka na sa korte ang mga kaso batok kang Nardo ug kung mapamatud-ang sad-an mabilanggo sulod sa pipila ka mga katuigan ug did-an nang makatrabaho o kaha makahupot ug bisan unsa nga posisyon sa gobyerno.
