DAVAO CITY – Target karon sa Philippine Drug Enforcement Agency (PDEA) nga mopalit ug 200 body cameras ug 120 drug sniffing dogs nga gamiton sa anti-illegal drug operations.
Matud pa kang PDEA Director General Aaron Aquino nga sa bulan sa Marso, posibleng mapalit na nila ang mga body cameras aron nga mamonitor ang mga lihok nga makuha sa agents nga nagpahigayon ug anti-illegal drug operations.
Pinaagi niini, mapakita sab sa publiko nga lihitimo ang ilang mga operasyon ug transparent.
Kung mapalit na ang nahisgutan nga gamit, aduna nay kinatibuk-ang 450 body cameras ang PDEA.
Sa kasamtangan, adunay standing guidelines nga gi-isyu ang PDEA atol sa pagpahigayon ug anti-drug operations diin ang mga ahente ug witnesses, ilabi na ang mga representante sa media kinahanglan nga mosuot ug body cameras.
Samtang adunay 45 na sab ka mga iro ang PDEA nga motabang sa mga agents sa pagsubay sa mga drugs paraphernalia.
Nasayran nga ang budget sa nahisgutan nga mga iro ang anaa sa P500,000 matag usa. Aduna na matud pay tulo ka mga kompanya ang mipailalom sa bidding.
Kabahin sab sa plano sa ahensiya ang pagpalit ug protective equipment sama sa shields, sakyanan ug intelligence equipment.
Nasayrsan nga kapin 29,000 ka mga Barangay latas sa nasud ang apektado sumala pa sa illegal nga droga gikan sa 42,000.
Sa nahisgutan nga ihap, 5,300 ka mga barangay ang gideklara nga cleared samtang 24,137 ang padayon nga gimonitor.
