DAVAO CITY – Nanawagan karon ang DPWH sa mga nanag-iya ug luna nga maapektuhan sa katukuran sa kapin 40 million pesos nga Davao City Bypass Project nga direktang makig-coordinate tali sa ahensiya inay nga mokuha ug serbisyo sa mga third parties.
Sa iyang sulat kang Mayor Inday Sara Duterte niadtong Enero 31, gikanayon ni Public Works Undersecretary for Unified Project Management Office-Right-of-Way (UPMO-ROW) Task Force Operations Emil K. Sadain nga adunay pipila ka mga kompanya o grupo ang nakig-negotiate sa mga land owners sa 18 ka mga barangay sa syudad nga sakop sa bypass road project.
Hinuon, wala na ginganlan ni Sadain ang nahisgutang mga grupo o kompanya, apan nagkanayon nga gitanyag sa mga nahisgutan ang ilang mga services pinaagi sa pagsaad sa mga landowners nga makadawat ug kuwarta nga mas labaw pa sa kantidad sa ilang luna, pinaagi sa 60-40 scheme o 60% sa kompanya ug 40% sa mga nanag-iya.
Gipangayo na usab niini ang tabang sa mga Brgy kapitan sa Sirawan, Marapangi, Bato, Lubogan, Alambre, Bankas Heights, Mulig, Bago Oshiro, Mintal, Tugbok, Tacunan, Matina Biao, Magtuod, Waan, Tigatto, Cabantian, Communal ug Indangan aron mo-abag sa DPWH sa pagpakatag sa nahisgutang impormasyon.
Samtang ang Unified Project Management Office Right-of-Way (UPMO-ROW) Task Force, nga gimugna subay sa Department Order No. 203 nga gi-issue ni Public Works Secretary Mark Villar in 2006, ang gisangunan nga imonitor ang mga ROW issues nga maka-apekto sa pagpatuman sa UPMO road, bridge ug flood control projects nationwide.
