DAVAO CITY – Nakadawat ug 129 ka mga kanhi miyembro sa Militia ng Bayan (MB) ug Pangkabuhayan starter tool kits atol sa closing ug awarding ceremony sa Skills Training Caravan sa Sitio Diat Palo, Barangay Napnapan, Pantukan, Compostela Valley.
Matud pa kang Capt. Jerry Lamosao, tigpamaba sa 10th Infantry Division, nga ang 129 returnees ang benepisiyaryo sa skills training caravan program sa municipal community training ug employment coordinator inabagan sa LGU-Pantukan, provincial government sa Compostela Valley, Office of the Congressman District II ug 46th Infantry Battalion.
Sagad sa mga benepisiyaryo mao ang mga kanhi miyembro sa Militia ng Bayan (MB), Sangay ng Partido sa Lokalidad sa NPA nga gikan sa Sitio Boringot ug Diat Palo sa Barangay Napnapan ug Sitio Panganason, Barangay Kingking, nga susamang nahimutang sa Pantukan, Compostela Valley.
Mitahan ang mga nahisgutan sa 46th IB nga nakabase sa Pantukan, ComVal. Ang mga partisipante malampuson nga nakakompleto sa training requirements sa MTEC-Pantukan tali sa National Certificate II (NCII) gikan sa Technical Education and Skills Development Authority.
Gitambagan sab ni Compostela Governor Jayvee Tyron Uy ang mga beneficiaries nga maningkamut gamit ang ilang nakat-onan nga kaalam aron nga makamugna ug maayo nga kalidad sa serbisyo ug trabaho.
