DAVAO CITY – Malampuson nga nadakpan ang mag-live in partner sa gipahigayon nga drug bust opeartion sa San Pedro Police Station sa Quirino Avenue, Barangay 4-A Poblacion, ning dakbayan sa Davao.
Nailhan ang mga dinakpan nga sila si Ram Harum Egonia, alyas Mar, 40, ug ang kapuyo niini nga si Romila Palen Golosino, 30, pulos nanimuyo sa Sasa Public Market, Kilometro 11.
Sumala sa San Pedro Police Station ang duruha iladong tigpayuhot og druga sa Purok 2, Open Canal, Barangay 76-A, Bucana hinungdan nga mihimo og drug bust ang kapulisan.
Human nagpositibo nga mobaligya ang duruha og shabu ngadto sa nagtakuban nga pulis, gilayon nilang gi-operasyonan nga miresulta sa pagkasikop sa duruha.
Unom ka mga pakite sa gituohang shabu nga dunay street value nga P20,000 ang nakuha sa posisyon sa mga dinakpan ingon man ang usa ka cellphone, drug paraphernalia ug usa ka kutsilyo nga dunay gitas-ong lima ka pulgada.
Sa kasamtangan, ang mga dinakpan gipangbalhog sa selda sa San Pedro kinsa mag-atubang og kasong pagsupak sa Republic Act 9165 kun Comprehensive Dangerous Drugs Act of 2002.
