DAVAO CITY – Gawas sa nagkataas nga kaso sa mga nataptan sa tigdas, padayon sab nga gitutukan karon sa City Health Office (CHO) ang kaso sa dengue.
Nanawagan si Beth Banzon, head sa tropical disease and control division sa CHO nga pahimuslan ang NS1 testing nga anaa karon sa mga health Center aron nga daling masayran kung nataptan sa sakit nga dengue.
Matud pa kang Banzon nga kung ipailalom sumala pa sa NS1 testing ang usa ka indibidwal sa unang adlaw sa kalintura niini, masayran gilayon sulod lamang sa 15 minutos kung apektado kini sa sakit nga dengue.
Gipasabot ni Banzon nga libre ang NS1 testing gumikan kay nagahatag niini ang CHO ngadto sa mga barangay.
Padayon sab ang panawagan sa buhatan ngadto sa publiko nga batasanon ang pagpanglimpiyo sa palibot ilabi na sa mga breeding site sa lamok aron malikayan ang pagpangitlog niini ug pagdahan sa kaso sa dengue.
