DAVAO CITY – Anaa na sa kustodiya sa kapolisan sa dakbayan sa Digos ang usa ka motorsiklo nga gi-deklara nga gi-carnap niining milabay nga adlaw ug na-recover kagahapon sa lungsod sa Malalag, Davao del Sur.
Naila ang biktima nga usa ka Victoria Aballes, hamtong ang pangidaron, residente sa Lim Extension, Barangay San Miguel, Digos City.
Nasayran nga niadtong Enero 8, kasamtangan nga tuig alas y media ang takna sa kagabhi-on ang nahisgutan nga motor giparada atubangan nga bahin sa iyang balay apan gi-carnap sa wala maila nga tawo.
Kagahapon mga alas 8:00 ang takna sa kabuntagon na-recover ang nahisgutan nga motorsiklo sa Barangay Kaputi-an sakop sa lungsod sa Malalag. Gihulagway kini nga usa ka Honda XRM 125 Motorcycle.
Gi-abandona kini sa wala maila nga suspek daplin sa karsada sa Barangay Kaputi-an nga sakop sa lungsod sa Malalag.
Barangay Official Kagawad James Lopez, 53 anyos, sa Barangay Kaputian ang naka-recover sa nahisgutan nga motorsiklo.
Na-alarma sila gumikan kay ang nahisgutan nga motor gibiya-an daplin sa karsada ug wala sab masayri kung kinsa ang nagbilin niini.
Mihimo ug dugang imbestigasyon ang kapolisan ug nasayran nga nahutdan ug gasoline ang motor hinongdan nga gibiya-an na lamang.
Migula sab sa ilang pagpanubay nga gi-carnap gikan sa dakbayan sa Digos ang nahisgutan nga motorsiklo.
Human gika-turnover ang nahisgutan nga motorsiklo mihimo karon ang kapolisan ug mga lakang alang sa posibling pag-ila sa mga suspek.
