DAVAO CITY – Ipadayon karong adlawa sa special multi-agency task force ang ilang imbestigasyon sa nahitabong sunog sa NCCC Mall diin karong panahuna mas mag-sentro sumala pa sa tulubagon sa mga tawo nga angayang manubag sa panghitabo.
Gikanayon ni Task Force spokesman Supt. Jerry Candido nga kinahanglang mahuman nila ang imbestigasyon sa adlaw nga Biyernes.
Na-una nang gibutyag ni Candido nga gibasura sa task force ang pasangil nga posibling arson o gituyo ang sunog, sanglit subay sa lig-ong ebidensiya nga ilang nahipos electrical short circuit ang hinungdan sa kalayo.
Dugang pa ni Candidao nga nasuta usab sa TF nga adunay kalapasan sa pagtuman sa Fire Code.
Apan, amping sumala pa karon ang TF sa pag-ngalan sa mga tawo nga angayang manubag gumikan kay padayon pa silang nagkuha ug testimonya gikan sa mga saksi gikan sa NCCC Mall ug sa SSI nga naa atol sa panghitabo.
Ang mga imbestigador gikan sa NBI ug CIDG ang nakahimo na ug oral interview ug bugtong kinahanglan na lamang karon mao ang testimonya sa na-interview nga mga witnesses aron ma-klaro na ang tanan.
Gi-angkon usab ni Candido nga ang pagka-relieve sa 5 ka BFP officials ang subay sa rekomendasyon sa investigating team human masuta nga kabahin sila sa mihatag ug fire certificate sa Mall ug sa SSI.
