DAVAO CITY – Mihatag ug pahayag si Davao City Mayor Inday Sara Duterte-Carpio kalabot sa gikanayong draft resolution sa blue ribbon committee kalabot sa lifestyle check sa iyang bana nga si Atty. Mans Carpio.
Matud pa kang Mayor Sara, premature pa aron nga hisgutan ang bisan unsa man diskusyon base sa draft report.
Subay sa opinyon sa Mayor, dili makatarunganon ang maong rekomendasyon gumikan kay gibase lamang kini sa “chismis” ni Mr. Taguba ug mga pagpamakak nga gihimo ni Sen. Antonio Trillanes.
Subli sab nga gibutyag sa opisyal nga welcome kaniya ang imbestigasyon sa Ombudsman kini aron nga matubag nila ang mga akusasyon ug walay problema sab kaniya kung ipailalom ang iyang bana sa lifestyle check aron nga matapos na ang isyu.
Gitawag sab ni Mayor Inday si Trillanes nga usa ka paid troll nga nanguha lamang ug mga bakak nga impormasyon ug akusasyon.
Kung tinuod sumala pa ang pasangil sa senador, nganong mokuha matud pa kini ug ebidensiya ngadto kanila butang nga sayod kini nga bakak lamang ang iyang gipangbutyag.
Dugang sa Mayor, natapos na ang eleksiyon ug aduna nay midaug ug maghulat na lamang sumala pa si Sen. Trillanes sa mosunod nga eleksiyon sa tuig 2022.
