DAVAO CITY – Nagpadayag sa ilang dakong pagpasalamat ang mga mananagat sa probinsiya sa Davao Occidental sa gihatag kanila nga mga non-motorized bancas.
Una ng gipangunahan sa Department of Social Welfare and Development (DSWD) pinaagi sa ilang Sustainable Livelihood Program (SLP) ang pagtunol sa mga bangka ngadto sa 24 ka mga mananagat sa Brgy. South Lamidan, Don Marcelino, Davao Occidental alang sa ilang panginabuhian ug aron nga mapalambo pa ang ilang kinabuhi.
Nahimong kabahin sa pagtunol sa mga bangka ang mga personahe gikan sa Bureau of Fisheries and Aquatic Resources (BFAR) 11 nga maoy nanguna sa registration sa non-motorized boats.
Nasayran nga ang SLP, Pantawid Pamilyang Pilipino Program ug Kalahi-CIDSS o Kapit Bisig Laban sa Kahirapan-Comprehensive and Integrated Delivery of Social Services ang pipila lamang sa mga programa sa gobyerno aron nga ma-alibyohan ang grabe nga kakabus diin pangunahan kini sa ahensiya sa DSWD.
