DAVAO CITY – Nagpadayag sa ilang mga sentimyento ang mga kandidata sa Hiyas sa Kadayawan 2017 kalabot sa mga nagkadaiyang isyu gikan sa kagubot nga binuhatan sa mga terorismo ingon man diskriminasyon batok kanila.
Kahinumduman nga kalakip sa mga Hiyas sa Kadayawan ang 11 ka mga tribu ingon man Moro Muslim tribes nga taga dakbayan sa Davao. Ang maong aktibidad kabahin sab sa tinuig nga kapiyestahan sa siyudad.
Matud pa sa Hiyas candidate nga gikan sa Maranao tribe nga si Sittie Haya Lanto Cairoden, 18, nagtuo siya nga ang pagsalmut sa Hiyas sa Kadayawan usa ka oportunidad nga ipahibalo sapubliko nga ang mga Muslims ilabi na ang mga Maranao dili mga extremists.
Kahinumduman nga ang tribu sa mga Maranao ang usa sa mga naapektohan sukad nga misulod sa Marawi City ang mga İslamic State-linked Maute Group kaniadtong Mayo 23 diin liboan ka mga Maranao ang mihiklin.
Matud pa kang Cairoden sagad sumala pa sa iyang ka-tribu ang biktima sa pagpang-bully ug ubos ang tan-aw kanila sa uban.
Sama kang Cairoden, gipasibaw sab sa Kagan tribe representative nga si Jerlyn Maminto Mancia, 19, ang iyang kadismaya gumikan kay sagad sumala pa sa mga kaigsuonang Moro ang mahukman nga adunay kalabutan sa mga terorista.
Nagtuo ang nahisgutan nga ang nag-unang yawe alang sa kalinaw mao ang paghatag ug respeto sa kultura sa uban.
Usa sumala pa sa iyang adbokasiya mao ang paghatag ug patas nga pagsabot sa kultura ingon man respeto sa nagkadaigang tribu sa dakbayan.
Ang Hiyas ng Kadayawan ipahigayon sa Agosto 18 sa University of Southeastern Philippines gymnasium sa Obrero.
