DAVAO CITY – Sa higayon nga moabot na ang resulta sa arson report sa Bureau of Fire Protection (BFP) Davao del Norte, iduso gilayon nila ang kaso sa mosunod nga semana batok sa sa mga sakop sa New People’s Army (NPA) nga responsable sa pagpangsunog sa Macondray Plastics Products, Incorporated sa Panabo City sa milabay nga Abril 29.
Matud pa kang Davao del Norte police chief Senior Superintendent Marcial Magistrado, nga mipasalig ang mga personahe sa BFP nga iduso gilayon ang kaso sa higayon nga masumite na nila ang katapusang imbestigasyon sa danyos sa mga propedad nga mibalor sumala pa ug P1 bilyones.
Gawas sa nahisgutan nga kaso, una na sab nga giduso ang kasong robbery in band sa Panabo Prosecutors Office batok sa duruha ka mga NPA nga gikanayong nangawat sa shotgun ug mga armas sa kompanya.
Samtang pabilin karon nga naka-red alert ang Davao del Norte human ang nahisgutan nga pagpangatake sa kompanya aron malikayan nga dili na mahitabo ang susama nga insidente.
Una ng gitambagan sa otoridad ang tanan nga mga security officers gikan sa nagkadaiyang mga establisemento sulod sa ilang area of responsibility (AOR) nga kinahanglan nga magbinantayon ug palig-onon pa ang gipatuman nga security measures ug gilayon nga makiglambigit sa otoridad sa higayon nga adunay mga katahapan nga tawo sa palibut.
